ಮಯೂರ ನೃತ್ಯ

ಅಲ್ಲಿ ನೋಡು ಹುಲ್ಲುಹಾಸಿ-

ನಲ್ಲಿ ತಲೆಯ ತೂಗಿ ನಲಿದು

ಬಳ್ಳಿಗೊರಳ ಕೊಂಕಿಸಿರ್ಪ ನೀಲಬರ್ಹಿಣ|

ತನ್ನರಸಿಯ ನೋಡಲೀಗ

ಮುನ್ನ ದೇವ ಕೊಟ್ಟ ಎರಡು 

ಕಣ್ಣು ಸಾಲದೆಂದು ನವಿಲು ಗರಿಯ ಬಿಚ್ಚಿತೋ?|

ಹೊಳೆವ ನೂರು ಕಣ್ಣ ತೆರೆದು

ಅಲೆವ ಮನವನವಳಲಿಟ್ಟು

ಬಲಿತ ರಾಗಭಾವವನ್ನು ಜಗಕೆ ತೋರಿತೋ?|

ಗರಿಗಳೆಲ್ಲ ಮನಸಿನೊಲವ-

ನರಿತು ಕಂಪಿಸಿಹವು ಮದನ

ಶರದ ಬಾಧೆ ತಡೆಯಲಳವೆ ಜಗದ ಜೀವಕೆ?|

ಮಲೆತು ತನ್ನ ಮನವನೆಲ್ಲ

ಬಲೆಯ ಮಾಡಿ ಸೆಳೆಯಲೆಳಸಿ

ನಲಿವ ಶಿಖಿಗೆ ಶಿವನು ತನ್ನ ಕೃಪೆಯ ತೋರನೇ?|

ಕಲೆವ ಬಯಕೆಯಿಂದ ರಮಣಿಯೊಲಿದು ಬಾರಳೇ?|

- ಉಮಾಶಂಕರ್ ಕೆ